2020-09-30
Улсын филармонийн симфони найрал хөгжмийн шинэчлэлд 1.8 тэрбум, Морин хуурын чуулгад хоёр зуун сая төгрөг олгохоор шийдвэрлэжээ
Улсын филармонийн "Симфони найрал хөгжим"-ийн хөгжмүүдийн шинэчлэлд нэг тэрбум найман зуун сая төгрөг, "Морин хуурын чуулга"-ын хөгжмийн зэмсгийг шинэчлэхэд хоёр зуун сая төгрөгийг Засгийн газрын нөөц хөрөнгөөс гаргахаар шийдвэрлэжээ.
Симфони найрал хөгжмийн зэмсэгүүд хуучирч муудан, ашиглах хугацаа нь 12-23 жилээр хэтэрчээ. Энэ нь уран бүтээлчдийн эрүүл мэндэд сөргөөр нөлөөлж, анхдагч өнгө нь алдагдан сэлбэн засварлах боломжгүй болсон байна.
Олон улсын стандартаар симфони найрал хөгжмийн бүрэлдэхүүнд хамгийн багадаа модон үлээвэр хөгжмийн 4 төрөл, гуулин 4, утсан хөгжмийн 5, цохивор хөгжмийн 5-10 төрөл буюу нийт 80 гаруй хөгжмийн төрөл дуугарч байж мэргэжлийн түвшинд үзэгчдэд хүрдэг аж.
Ерөнхий сайд Даваа гарагт Соёлын яаманд ажиллах үеэрээ хөгжмүүдийг шинэчилж өгөхөө мэдэгдэж байсан юм.